ബോളിവുഡിന്റെ ബാഡ് ബോയിയായിരുന്നു ഒരിക്കല് സല്മാന് ഖാന്. എപ്പോഴും കേസുകള്. ഐശ്വര്യ റായുമായുള്ള പ്രണയകാലത്താണെങ്കില് കുപ്രസിദ്ധികള് അതിലേറെ. എന്നാല് അതില് നിന്നൊക്കെ മാറി സിനിമയില് നന്നായി ശ്രദ്ധിക്കുന്നകയാണിപ്പോള്. ഇക്കാര്യത്തില് കൂട്ടുകാരി കത്രീന കൈഫിന്റെ സ്വാധീനം നന്നായി ഉണ്ടെന്നും കേള്ക്കുന്നു. എന്നാല് ഭൂതകാലം വേട്ടയാടുകയാണു സല്മാനെ.
2002 മുംബൈയിലെ ബാന്ദ്രയില് ഒരാളുടെ മരണത്തിനിടയാക്കിയ കാര് ആക്സിഡന്റാണ് ഇപ്പോള് പ്രശ്നമായത്. 2002 സെപ്റ്റംബര് 28ന് വെളുപ്പിന് ഏതാണ്ട് മൂന്നു മണിയോടെ ബാന്ദ്രയിലെ ഒരു കടത്തിണ്ണയിലേക്ക് സല്മാന് തന്റെ ലാന്ഡ് ക്രൂയിസര് ഓടിച്ചു കയറ്റുകയായിരുന്നു. അവിടെ കിടന്നുറങ്ങിയിരുന്ന ഒരാള് അപകടത്തില് കൊല്ലപ്പെട്ടു. എട്ടു മണിക്കൂറുകള്ക്കു ശേഷം സല്മാന് കീഴടങ്ങി. ഇപ്പോള് കേസില് വിചാരണ തുടരുകയാണ്.
അപകടം നടക്കുമ്പോള് സല്മാന് നന്നായി മദ്യപിച്ചിരുന്നു എന്ന റിപ്പോര്ട്ടാണിപ്പോള് കുഴപ്പമാവുന്നത്. സല്മാന്റെ ബ്ലഡ് സാമ്പിള് പരിശോധിച്ച കെമിക്കല് അനലിസ്റ്റ് ഡി. കെ. ബാലകൃഷ്ണനാണ് കഴിഞ്ഞ ദിവസം റിപ്പോര്ട്ട് കോടതിയില് നല്കിയത്. അപകടത്തിന്റെ പിറ്റേന്ന് ഉച്ചയ്ക്ക് രണ്ടു മണിക്കാണ് സല്മാന്റെ ബ്ലഡ് സാംപ്ള് പരിശോധിച്ചത്. രക്തത്തില് 62 എംജി ആല്ക്കഹോള് കലര്ന്നിരുന്നു എന്നാണ് റിപ്പോര്ട്ടിലുള്ളത്. അനുവദനീയമായ അളവിലും കൂടുതലാണിത്. ജൂലൈ പതിനാലിന് ബാലകൃഷ്ണനെ സല്മാന്റെ അഭിഭാഷകന് ദീപേഷ് മേത്ത വിസ്തരിക്കും.
കേസില് മുഖ്യ സാക്ഷിയായിരുന്ന രവീന്ദ്ര പാട്ടീല് 2007ല് മരിച്ചു. സല്മാന് നന്നായി മദ്യപിച്ചിരുന്നു എന്ന് പാട്ടീല് കോടതിയില് പറഞ്ഞിരുന്നു. മദ്യപിച്ചു വണ്ടിയോടിക്കരുതെന്നു താന് പല തവണ പറഞ്ഞെങ്കിലും സല്മാന് അതു കേട്ടില്ല എന്നും പാട്ടീലിന്റെ മൊഴിയിലുണ്ടായിരുന്നു