ഇപ്പോള്‍ ബോളിവുഡിന്‍റെ രാജാവാണ്. സ്വന്തമായി പ്രൊഡക്ഷന്‍ ഹൗസ്. ഇന്ത്യന്‍ പ്രിമിയര്‍ ലീഗില്‍ സ്വന്തം ടീം. മുംബൈയിലെ മന്നത്ത് എന്ന വീട് കൊട്ടാര സദൃശം. രാജകീയമാണ് ഷാരുഖ് ഖാന്‍റെ ജീവിതയാത്രയിലെ നേട്ടങ്ങള്‍. കരിയറിലും ജീവിതത്തിലും നേടിയതെല്ലാം സ്വന്തം അധ്വാനം. ഫൗജി എന്ന ടിവി സീരിയലിലൂടെ വന്ന് ബോളിവുഡിന്‍റെ സൂപ്പര്‍താരപദവിയിലേക്ക്. നാല്‍പ്പത്തിനാലാമത്തെ വയസില്‍ കോടി
കളുടെ സമ്പാദ്യമുള്ള ഷാരുഖിന് ആദ്യം കിട്ടിയ പ്രതിഫലം എത്ര എന്നറിയുന്നത് കൗതുകമായിരിക്കും. ഷാരുഖ് തന്നെ ട്വിറ്ററില്‍ ഇക്കാര്യം പങ്കു വച്ചിരിക്കുന്നു.
ആദ്യം കിട്ടിയ പ്രതിഫലം അന്‍പതു രൂപ. വിഖ്യാത ഗസല്‍ ഗായകന്‍ പങ്കജ് ഉധാസിന്‍റെ സംഗീത പ്രോഗ്രാമില്‍ അതിഥികളെ അവരുടെ ഇരിപ്പിടങ്ങളില്‍ കൊണ്ടു പോയി ഇരുത്തുന്ന ജോലിയാണ് ഷാരുഖിനു കിട്ടിയത്. ഡല്‍ഹിയിലായിരുന്നു ആ പ്രോഗ്രാം. പ്രതിഫലമായിക്കിട്ടിയ അന്‍പതു രൂപയുമായി ഷാരുഖ് ഉടന്‍ തീവണ്ടി കയറി. നേരെ ആഗ്രയിലേക്ക്. പ്രണയകുടീരമായ താജ്മഹല്‍ കാണാനുള്ള യാത്രയായിരുന്നു അത്.
